Netanyahu leh US sorkar inhriatthiam lohna zual zel

Israel Prime Minister Benjamin Netanyahu leh US sorkar inhriatthiam lohna chuan zuallam a pan zel a, Netanyahu chuan America leh ram dangte chu Iran-in nuclear ralthuam a neih tur dang tura hmalakna chawlhsanah a puh.

Hetihlai hian Republican hruaitute chuan karleha US Congress-a thu sawi turin Netanyahu hi an sawm a, hei hi Democrats lam chuan an sawisel nasa hle a, Republican hruaitute hian Democrats lam leh White House pawn rawn hmasa loin Israel PM hi an sawm niin an sawi. Israel PM chuan thu sawi tura sawmna hi a pawm tawh a ni.

House Speaker John Boehner-a'n Israel PM a sawmna chhan hi US President Barack Obama Iran policy a duh lohzia a lantirna kawng khata ngaih a ni. Netanyahu hian Iran nuclear program leh Islamist fir­fiakte chungchang a sawi­chhuah rin a ni.

US National Security Adviser Susan Rice chuan Netanyahu-a thusawi hi ram pahnihte inlaichinna a tichhia a ni, a ti. White House thupuangtu pawhin US-Israel inzawmna chu tihnepah a vau bawk.

US Secretary of State John Kerry leh Iran Foreign Minister chuan Iran nuclear program chung­changah inbiakna an nei mek a ni. Netanyahu chuan, "US leh ramdangte chuan Iran-in nuclear ralthuam siamna tur hmanrua a neihte hian an pawmsak a ni," a ti. White House leh US President chu a zah hle a, mahse Israel himna tichhe thei laka venghim tur chuan a tih theih ang ang a tih a ngai niin Netanyahu chuan a sawi.

John Kerry chuan Netanyahu-a thutlukna siam dan chu a dik tawk lo tih a sawi a, Iran nuclear program chungchanga inbiakna neih meka thu­tlukna siam tur chuan a la hma lutuk a ni, a ti.

Congress-ah Israel PM-in thu a sawi hunah hian Democrats member eng emaw zat chuan tel an tum loh thu an sawi a, an zingah hian vice president Joe Biden pawh a tel. President Obama pawhin Netanyahu hi hmuh a tum lo bawk.