Putin-a'n Ukraine gas supply tihtawpah a vau
Russia President Vladimir Putin chuan Ukraine-in gas a leina man chu a pek lawk loh chuan gas supply tihtawpah a vau a, hei hian Europe rama gas supply thlengin a nghawng dawn tih a sawi.
Putin chuan Ukraine-in gas man a pek hnuhnung ber chu ni thum ni li daih chauh a ni tih a sawi a, a gas leina man hi a pek thuai loh chuan Ukraine tana gas pekchhuahna chu khar a nih tur thu a sawi. Mahse huntiam chin erawh a sawilang lo.
Kar hmasa khan Russia chuan Ukraine sorkar chu a ram khawchhak lam, Russia thlawp inlakhran duhte awmna biala gas pek tihtawpsakah a puh. Putin chuan khawchhak lam biala gas supply tihtawp a nih vang hian mi maktadui 4.5 velin harsatna an tawh phah niin a sawi bawk.
"Gas supply tihtawp anih vangin Ukraine khawchhak biala mi tam tak chu rilṭamin an awm phah a, Ukraine ram hruaitute hian mipuite'n harsatna tawh dan leh an dinhmunte a ngaihtuah pui lo a ni," a ti.
Nikum October thla khan Russia leh Ukraine hian gas supply chungchangah inremna an lo siam tawh a, an inremna ang chuan Ukraine hian gas a leina man hi a pek lawk zel a ngai dawn a ni.