Bangladesh Parliament ṭhiah a ni : President office

Bangladesh President office chuan nimin khan an ram parliament chu ṭhiah (dissolve) a ni tih an tarlang. Ramchhunga nawrh huaihawtten prime minister Shiekh Hasina bang tura an ngiat hnuah Thawhṭanni khan Hasina chuan PM a nihna aṭanga banna thehlutin, a tukah Parliament hi ṭhiah a ni ta a ni.

Bangladesh President Mohammed Shahabuddin chuan political party, civil society hotute leh Students Against Discrimination hotute nena inbiakna an neih hnuah parliament hi a ṭhiat a ni. Bangladesh nawrh huaihawtnaa a bultumtu, Students Against Discrimination (SAD) chuan Thawhlehni tlai dar 3 hmaa President-in parliament a ṭhiat lo a nih chuan nasa zawka nawrh an huaihawt tur thu an sawi a, President chuan hun tiam a ral hmain parliament hi a ṭhiat a ni.

Prime minister Hasina-in banna a thehluh hnuah, Bangladesh rorelna chu sipaite kuta dah lailawk ni mah se, SAD chuan sipai kaihhruai sorkar chu an pawm theih loh thu leh sorkar lailawk siam an duh thu an tarlang. He sorkar lailawkah hian Nobel Peace laureate Muhammad Yunus chu chief adviser atana ruat turin zirlaite chuan duh thu an sawi a, Yunus pawhin chief adviser hna chu a chelh theih tur thu a sawi ve bawk.

Muhammad Yunus hi kum 84 mi niin, a bank Grameen Bank hmanga Bangladesh thingtlanga cheng mi retheite ṭanpui leh chawikanna tura a hma lakna avangin kum 2006 khan Nobel Peace Prize a dawng a ni. Hasina rorelna hnuaiah hian eiruknaa inhnamhnawiha puhin thubuai pawh siamsak a ni tawh a, mahse hei hi thu dik lo leh politics-a an beihna niin a sawi.

United States chuan Bangladesh-a sorkarna chelhtu thar an awm dawn a nih chuan Bangladesh mipuite thlawp, dan hnuaia awm tur leh mipui sorkarna din ni se an duh tih an sawi. Hemi bakah hian nawrh huaihawt a nih laia dan bawhchhiate chu hremna pek ngei ni se an duh tih State Department thupuangtu Matthew Miller chuan a sawi bawk. US State Deparment chuan US khua leh tuite chu Bangladesh tlawh lo turin a ngen a, hemi bakah hian US sorkar hna thawk leh an chhungte chu US lama let turin a hriattir.

Bangladesh President chuan parliament ṭhiah a nih hnuah sorkar lailawk din a ni thuai dawn tih sawiin, an hruaitu tur erawh a la chiang lo thung. Hetih rual hian hmeichhe PM hmasa ber leh Sheikh Hasina elpui, Khaleda Zia chu parliament ṭhiah thu puan a nih hnu hian tan-in aṭangin chhuah zalen a ni. PM hlui Zia hi eptu pawl Bangladesh Nationalist Party (BNP) hotu niin presidential system aṭanga parliamentary form of govenrment-a Bangladesh thlak thlengtu a ni.