China-ah kum 12 chhunga innei an tlem ber ṭum thleng; University-ah marriage related degree course siam dawn

China-a marriage registration data-a a lan danin, kumin chanve, January - June thla chhungin innei mtd 23.43 an awm a, hei hi kum 12 chhunga an tlem ber ṭum a ni. Nikum kum chanve chhunga innei zat aiin kumin kum chanve chhunga innei hi 498,000 in an tlem zawk.

Kum 2014 aṭang khan China rama innei zat hi a tlahniam chho a, kum 2023 bikah kha chuan a kum hmasa aiin 12.4% an pung a, kum dangah erawh an tlem zel a ni. Kuminah hian kum 1980 hnuah an tlem ber ṭum thleng tura rin a ni zui bawk. Inneih leh khawsak senso hautak vang te, hna thawh tur ṭha vang leh, nupui/pasal neih chungchanga an ngaihdan danglam chho zel avangin ṭhalai tam takin nupui/pasal nei loa awm an duh zawk tawh nia tarlan a ni. Innei an tlem zel avangin nau piang zat pawh a tlahniam zel a, hei vang hian nakin lawkah an ramah ṭhalai tlem chhoin, kum upa zawk an pun chhoh dawn avangin thuneitu lam pawhin an vei tawh hle.

Ṭhalai zingah nupui/pasal neih ngaih pawimawh a, nau piang pawh an pun chhoh leh theihna tura hmalakna kawng khat atan, Civil Affairs Univerity chuan inneih leh a kaihhnawih thilah degree course a siam thar dawn. He degree programme hming atan hian 'Marriage Services and Management' tiin, China-in inneih leh family culture a ngaihhlut dante chu zirlaite bakah mipuiah pawh zirtir an tum. Kumin bikah province 12 aṭangin undergraduate zirlai 70 lak an ni ang.