UN-in Israel beihnaa inhnamhnawih a staff 9 a ban leh

United Nations chuan October 7, 2023-a Palestinian firfiak pawl, Hamas kaihhruaia Israel beih a nih ṭuma inhnamhnawih, Palestinian refugee agency, UNRWA-a thawk staff pakua a ban belh leh.

UN Secretary-General office chuan UNRWA staff ban belh a nih chungchang hi sawi mah se, Israel beih a nihnaa an inhnamhnawih dan erawh a sawilang lo. A hmain UNRWA chuan Israel beih a nih chungchanga Hamas thlawptu, an staff 12 chu lo ban tawhin, mi dang pasarih chu leave without pay in a chawlh tir bawk.

Kumin January thla khan Israel chuan October 7-a Hamas-ten an ram chhim lam an beihnaa mi 1,200 chuang thihna thleng leh, mi 250 rukbo an nihnaah khan UNRWA staff 12 an inrawlh tih a lo puang tawh a ni. Hemi hnu hian UN internal watchdog chuan a chhui zui nghal a, UNRWA tana sum pe ṭhin ram eng emaw zatin an sum pek an titawp zui bawk. Hei vang hian UNRWA sum indaih lohna hi USD mtd 450 vel a tling a, a hnuah US tih loh ram dangte chuan fund hi an pe chhunzawm leh a ni.