Tangrual pawlte'n Syria-a IS firfiakte hmun an bei

Islamic State (IS) firfiakte'n Syria rama Kristian 200 chuang an rukbo hnuah, Ningani khan US kaihhruai ṭangrual pawlte chuan Kristiante rukbo an nihna hmun, Syria hmarchhak lama firfiakte hmun an bei.

Syrian Observatory for Human Rights chuan ṭangrual pawlte'n an beih hi Hasakeh province-a Tal Tamr khaw bul a ni, a ti. Firfiakte hian Thawṭanni khan Tal Tamr khaw chhehvela thingtlang khuate chu Kurdish security force-te kut aṭangin an laksak. Tal Tamr khua erawh chu Kurdish sipaite kutah a la awm a ni.

IS firfiakte'n Kristian 200 chuang an rukbo zinga a tam zawk chu hmeichhia leh naupang an ni. Observatory chuan an mi rukbote chhuah an nih theih nan inbiakna neih mek a nih thu a sawi.

Tal Tamr khaw bula inbeihna thleng vang hian mi 5,000 chuang chu firfiakte hlau hian an tlanchhe tawh a, an zinga tam tak chu an province-a khawlian ber Qamishli-ah an tlanchhia. He khawpui hi Kurdish sipaite kuta awm a ni. Assyrian Organisation for Relief and Development hotu, Jean Tolo chuan Qamishli khuaa tlanlutte hi an khawngaihthlak thu sawiin, bungrua leh thawmhnaw engmah pawh chuh hman loin an haklai nen chauh an rawn lut a ni, a ti. Qamishli bakah province khawpui, Hasakeh-ah pawh mi tam tak an tlan lut bawk.

US official-te chuan IS group-in an mi mante an thahna video an tih­chhuah ṭhinah hmaituama lo lang, an mi hrente tihlumtu leh vauna thu sawi ṭhin, 'Jihadi John' tia sawi chu a nihna dik tak hriatchhuah a ni tawh tih an sawi.

Jihadi John tia sawi hian British accent a hmang a, a nihna dik tak hriat loha hun rei tak a awm hnuah, Ningani khan hriatchhuah a ni a, hei hi US Congress pawhin a nemnghet tawh nia sawi a ni bawk.

Rawng taka an mi mante that ṭhintu, Jihadi John hi a hming tak chu Mohammed Emwazi a ni a, Kuwait-a piang, London-a seilian a ni. Emwazi hi kum 2012 khan Syria-ah a kal a, IS te hi a zawm ta nia rin a ni.

Emwazi hi kum 1988-a piang a ni a, kum 6 mi a nihin UK ah an pem a ni. University of Westminter aṭangin kum 2009 khan computer programming-ah a graduate a ni. Kum 2009 khan Tanzania-ah a zin a, mahse a thlen veleh thuneitute'n hrengin an thawn kir leh nghal a, kum 2010 khan Birtain-ah counterterrism official-te an lo hreng tawh bawk. Mahse hren a nih chhan hi thuneitute chuan an sawilang lo.