Argentina President thubuai tihtawpsak

Argentina-a federal judge chuan an ram President Cristina Fernandez de Kirchner leh foreign minister Hector Timerman-te thubuai a tihtawpsak.

President leh foreign minister hi kum 1994-a Jewish centre bomb hmanga beih a nih ṭuma Iran official inhnamhnawiha puhte thup tuma puh an ni. Mahse Judge Daniel Rafecas chuan an puhnaah hian finfiahna ṭha tawk a awm lo tiin thubuai a titawpsak a ni.

Judge Rafecas chuan January thlaa a chenna ina thia chhar, special prosecutor Alberto Nisman-a'n President a puhna chungchanga report a siam, phek 350-a chhah chu a zirchian hnuah Iran official-te thup tumin Argentina sorkarin inremna a siampui nia sawi chu finfiahna engmah a awm lo tih a sawi.

Defence Minister Agustin Rossi chuan Judge thutlukna siam dan chu lawmawm a tih thu a sawi a, "Nisman-a puhna hi rintlak a ni lo tih kan sawi fo tawh a ni," a ti.

Public prosecutor Nisman hian President a puhna chungchanga congressional committee hmaa finfiahna pek a tum hun hma lawkin a chenna inah thia chhar a ni. Kar hmasa khan a thihdan hi chhuichiang a, rorelna dik hlenchhuah phutin mi ṭhahnem takin Buenos Aires ah kawng an zawh.

President Fernandez chuan Nisman hi intelligence agent-in thu dik lo hrilhin a ngaihtuahnate a hruai kawi zo tiin a sawi a, a thihna chungchangah sorkarin inrawlhna a nei lo tih a sawi.