Bangladesh : Sorkar thar kaihruai turin Yunus ruat

Bangladesh president Mohammed Shahabuddin chuan sorkar lailawk an din tur hotu atan Mohammad Yunus chu ruat a ni tih a puang. Ram chhunga nawrh huaihawttute chuan sorkar lailawk piang tura member dang tel turte pawh tihfel thuai an phut.

Bangladesh sorkar thar hian rorelna fawng chelhin mipui thlan sorkar a pian thuai theih nan hma a la dawn a ni. Mohammad Yunus chuan mipuiten sorkar an rinna chu siamṭhat hmasak a ngai tih sawiin, sorkar lailawk din a nih chhung bak roreltuah tel a tum lo tih a sawi bawk. Mipui thlan sorkar a pian hunah an kutah thuneihna a hlan leh dawn a ni.

Yunus hi a bank din, Grameen bank kaltlanga retheihna um bo kawnga a thawh hlawk avangin kum 2006 khan Nobel Peace Prize hlan a ni. Hasina sorkar khan a bank kalphung dik lo awmte chhuiin kumin January khan thla ruk chhung tang turin a chungthu a lo relsak tawh. Yunus hian Hasina paihthlak tumna hi a thlawp hle a, tuna an dinhmun chu zalenna an hmuh vawi hnihna niin a sawi.

Hindu temple beih a ni

Bangladesh Hindu Buddhist Christian Unity Council chuan mipui lungawi loten sakhaw tlem zawkte an bei niin an tarlang. Hindu temple 10 chuang Thawhṭanni khan beih an ni tih an tarlang bawk.

Nawrh huaihawtte hian Hindu-te chenna in leh dawrte an suasam bakah Hasina lam ṭangte an bei a, Hindu sakhaw vuantu pakhat chu Bagerhat district-ah vuak hlum a ni. Tualchhung buaina a chhuah hnuaah Thawhṭanni kha ni khata thi an tam ber ṭum niin mi 122 chuang an thi nia tarlan a ni.

Ramchhung hmun hrang hrangah Hasina party, Awami League party office chu hal leh suasam a ni bawk. Dhaka-a United States embassy chuan Bangladesh mipuite chu inbengdai tura an duh thu a sawi a, European Union hnuaia thawkte pawhin sakhaw tlem zawk leh sakhaw biakna hmunten beih a tawk nia sawi chu ṭha an tih loh thu an sawi ve bawk.