Hamas hruaitu thar atan Yahya Sinwar ruat

Palestinian firfiak pawl, Hamas hruaitu thar atan Yahya Sinwar ruat a ni tih Hamas chuan an puang chiang ta.

Hamas hruaitu, Ismail Haniyeh chu kar liam ta khan Iran khawpui, Tehran-a a chenna inah thah a ni a, hemi hnu hian a thlaktu tur hi an ngaihtuah zui a ni. Doha khawpuia ni hnih chhung ngaihtuah a nih hnuin Sinwar hi ruat a ni ta a ni. Hamas official chuan an pawl hruaituten Sinwar hi lungrual takin an hotu atan an thlang tih a sawi.

Yahya Sinwar hi Khan Younis refugee camp, Gaza-ah 1962 khan lo piangin, a hun tam zawk Israel jail-ah a hmang. Kum 1998-a a vawi thumna atana man a nih khan dam chhung tang tura hremna pali zet pek a ni. Mahse kum 2011-a Israel leh Palestinian-ten tang an inthleng ṭuma Palestinian tang 1,027 chhuahnaah khan a tel. Kum 2017 aṭang khan Gaza Strip chhungah Hamas pawl hruaitu nihna hi a lo chelh tawh a, tunah chuan politics lama an pawl hotu lu ber dinhmun a chelh dawn ta a ni.

Sinwar hi Hamas hruaitu hlauhawm ber zingah ngaih a ni a, Hamas security service 'Majd' dintu a ni. Israel most wanted-list ah awmin, US pawhin "international terrorists" list-ah a lo dah tawh bawk. October 7, 2023-a Hamas-ten Israel an beihna kha a ruahmantu ber nia puh a ni a, hemi hnu hian amah pawh biru zuiin, Gaza-a lei hnuai an verhah a biru nia rin a nih thu US secretary of state Antony Blinken chuan June thla khan a sawi.

Israel foreign minister Israil Katz chuan X ah "Ismail Haniyeh thlaktu tur leh hruaitu thar atana Yahya Sinwar dah hi, he pawl hnawksak tak mai hi khawvel aṭanga rang taka nuaibo a ṭul zual hle chhan pakhat a ni," a ti.