Kamala Harris-i'n a thawhpui atan Minnesota Governor thlang

US vice president Kamala Harris chuan an ram huna Thawhlehni khan kumin November thlaa US President thlanna neih turah a thawhpui, a vice president candidate atan Minnesota governor Tim Walz a thlan thu a puang.

US President thlanna neih tura president Joe Biden chu Democratic presidential candidate a nihna aṭanga a inhnuhdawh hnuah Kamala Harris hian a thlak a, party delegate-te pawhin an thlawp vek a ni. Hun eng emaw chen a vice president candidate tur hi tihfel loa a awm hnuah, Harris hian Thawhlehni khan Instagram kaltlangin Walz a thlan thu hi a puang ta a ni.

Tim Walz hi kum 60 mi niin, US Army National Guard member hlui leh zirtirtu hlui a ni. Democrats lam chuan Walz vang hian thingtlang lam leh mingo zingah an tlak nat phah viau an beisei. Harris-in a thawhpui tura a thlan hi a pawm thu leh, a tana chawimawina ropui tak a nih thu a sawi.

Vice president candidate atana Walz a thlan thu a puan hnuah, Kamala Harris leh Walz te hian Philadelphia-ah rally an nei dun nghal. Wazl hian an khingpui, Republican party president candidate Donald Trump chu na takin a bei zui nghal a, an ram dante nuihzat a, buaina leh inṭhendarhna thlentu tih chu President a nih laia a record awmchhun niin a sawi.

Trump leh a vice president candidate, senator JD Vance pawhin Harris leh Walz hi an bei let ve nghal a, an elpui turte chu thiangzau lutuk tiin an puh. Trump chuan a social media platform ah, 'America chanchina thiangzau dun ber an ni dawn a ni," a ti.