Ukraine-in Russia ram chhungah a sipaite tir lut

Russia defense ministry chuan Ukraine nena an ramri, Kursk region-ah Ukraine chuan Thawhlehni khan sipai leh indonaa hman chi lirthei a tir lut tih a tarlang.

Ukraine-in Kursk region a bei nia sawi hi Russia president Vladimir Putin chuan Russia ram tih thinur tumna a ni, a ti. Kursk huam chhunga Ukaine-in sipai an tir lut tih an hriat hnu hian Putin chuan defense leh security official-te chu kawmin venhimna leh beih let dan turte an sawi ho a ni.

President Putin chuan Kursk huam chhungah hian Ukriane sipaite chuan chenna in, vantlang hmunhma leh ambulance-te chu an bei niin a sawi. Russia defense ministry chuan Ukraine sipai 300, tank 11 leh indonaa hman chi lirthei 20 an tir lut tih an tarlang bawk.

Ukraine sipai leh indona lirthei tirh luhte hi Russia chuan lo bei letin sipai 100 an thah bakah mi eng emaw zat an hliam tih Russia Army chief of staff, Valery Gerasimov chuan a sawi. Russian Foreign Ministry thupuangtu, Maria Zakharova chuan Ukraine beihna avang hian mi pahnih thi an awm a, mi 24 in hliam an tuar tih a sawi ve bawk. Ukraine hian Kursk region-a inbeihna chungchangah hian thuchhuah an la siam lo thung.

Kursk region Governor, Alexei Smirnov chuan huaisen taka indona an hmachhawn thu a sawi a, Kursk mipuite chu hliam tuar thisen pek ngaite thisen pe turin a sawm. Ukraine beihna avang hian mi 200 chuang hmun him lamah sawn chhuah an ni, a ti. Kursk region-a Ukraine ramri thui zawng hi kilometer 245 niin Russia-in inbeihna a thleng nia an sawi chungchang hi Ukraine defense ministry chuan a sawi chiang duh lo a ni.