Trump hian ka dam chhungin White House a rap leh tawh tur a ni lo : Pelosi
United States house speaker hlui, Democrats party hruaitu Nancy Pelosi chuan Republican party president candidate, Donald Trump chuan president nihna chelh tawh lo turin a duh tih a sawi. Pelosi hian a dam chhungin Trump-a'n White House a rap lai hmuh leh a duh tawh lo tih sawiin hemi tur hian hma a la zel dawn tih a sawi bawk.
Democratic Party-in president candidate an siksawina tura thawh hlawk tak Pelosi hian presidential candidate debate-a Joe Biden a chet chhiat hnu leh, mipui ngaihdan laka president-a tling tura an rin tawh loh hnuah an party presidential candidate ni lai, Joe Biden chu a thlawp thu sawi mah se a hmalam hun tichiang tura a duh thu a sawi ṭhin. Trump a dinhmun a ṭhat chhoh hnuah Pelosi hian Biden chu a dinhmun tichiang thuai tura nawrin Biden a inhnuhdawh hnuah Democratic party aiawh turin Kamala Harris thlan a ni zui a, Pelosi huhang ngah zia hi hmuh theihin a awm a ni.
Pelosi hian Trump khingthla thei tura ngaih, Kamala Harris chu an party candidate atana a thlawp thu sawiin vice president chuh tura a thlan, Tim Waltz pawh a duhzawng tak a nih thu a sawi bawk. Kumin kumtawpa inthlan neih turah Trump hnehna chantir loh chu Pelosi duh ber niin Biden-a sorkar laia hmalakna ṭha takte chu Trump a tlin chuan engmah lo maiah a chhuak dawn niin a sawi.
Democrats presidential candidate atana Kamala Harris ruat a nih hnuah Democrats party lam dinhmun pawh a kang sawt hle. Joe Biden-Donald Trump ten debate an neihah khan Biden a che ṭha lo hle a, hei vang hian Trump pawhin ram pum huap mipui ngaihdan laknaah pawh point ngain hma a hruai a ni. Mahse Biden a inhnuhdawh hnua Harris zawk candidate atana a awm tak hnuah, Harris dinhmun hi a kang chak hle a, mipui ngaihdan lak hnuhnung berah pawh Trump aiin 1% in a sang zawk.
Hetih lai hian Trump hi Democrats thlawptu tamna state, New York-a Jewish voter zingah a dinhmun a ṭha chho thung. Jewish voter zingah 50% in Trump an thlawp tih an sawi. Biden inhnuhdawh hmaa June thlaa ngaihdan lakah khan, Jewish voter zingah Biden duhtu 52% leh Trump duhtu 46% an ni a, mahse Harris-i'n Biden a thlak tak hnuah Jewish voter engemaw zatin Harris aiin Trump hi an thlang leh ta zawk a ni.
American Enterprise Institute chuan kum 1968 aṭang khan America-a Jewish voter-te hian a tlangpuiin Republican aiin Democrats lam an thlawp zawk niin a tarlang. Mahse ngaihdan lak thar berah chuan a tam zawkin Republican lam an awn ta thung a, hei hi Gaza Strip indona thleng mekah Harris-in thla hmasaa Israel vauna thu sawi a, Israel-in Rafah khawpui a beih chuan a nghawng let na tak a tuar ang tia a lo sawi nghawng pawh a ni theia ngaih a ni.