West Bank-ah Israel tleirawl vithlum
West Bank-a Juda-te chenna hmun, Kiryat Arba-ah Ningani zan khan Palestinian mi pakhatin Israel hmeichhe tleirawl, kum 13 mi, Hallel Yaffa Ariel-i chu a bedroom chhungah a vithlum a, security guard-ten pawikhawihtu hi an kaphlum nghal.
Pawikhawihtu hi Mohammed Tarayreh, kum 19 mi, Bani Naim khuaa cheng a ni a, Ariel-i te inah hian zana an mut laia lutin a vithlum a ni. Security guard pakhatin chhan a lo tum chu a lo vit hliam bawk a, guard dang pakhatin a kaphlum a ni. Ariel-i hi Juda mi, US citizenship nei a ni.
Nikum October thla aṭang khan Palestinian mite kut tuarin Israel mi 34 an thi tawh a, pawikhawihtu nia puh Palestinian mi 200 chuang kahhlum an ni tawh bawk.
Israel tleirawl beih a nih hnu hian Israel sipaite chuan Bani Naim khaw kawng hi an dangchat nghal a, pawikhawihtu Tarayeh-a in pawh ṭhiahsak an tum bawk. Israel rama a chhungkhat laina awmte hnena hnathawh phalna pek pawh hlihsakah an vau a, a pa pawh an man tawh bawk a ni. Mohammed Tarayeh-a laichin, Adnan Tarayeh chuan Mohammed hi school pawh kal chhunzawm tawh loin chhang siamna hmunah a thawk ṭhin niin a sawi.
Israel Prime Minister Benjamin Netanyahu chuan rawng taka mahni in chhung lum ngeia hmeichhe tleirawl thah a ni chu a dem thu a sawi. Lusun chhungte chu Israel ram pumpuiin an tuarpui thu a sawi a, pawikhawihna thleng chuan Israel mite chu a tichhe mai dawn lo tih a sawi nghal bawk.
Hetihlai hian human rights group chuan Palestinian misual
ṭhenkhatin pawikhawihna an thlen avanga Israel-in Palestinian hnam pum chunga hremna a lekkawh
ṭhin chu ṭha an tih loh thu an sawi. Hebron-a hmunpui nei, Youth Against Settlements dintu leh human rights activist, Issa Amro chuan tualthahna thleng chu a dem thu a sawi rualin, pawikhawihna thlenna chhan chu Israel-in Palestinian ram a luahsak vang a ni, a ti. "Palestinian mite chuan hetianga tualthahna thleng ṭhin hi kan duh lo a, mahse a tawpa mawhphurtu dik tak chu Netanyahu leh Israel sorkar a ni. Naupangte chu Palestinian ram laksakna tura inphenna atan an hmang ṭhin a ni" a ti.