British PM chuhtu zing aṭangin Boris Johnson inhnukdawk

Britain Prime Minister David Cameron-an PM a nihna aṭanga ban a tum thu a puan hnuah, amah thlak tuma chuh tura rin zing aṭangin London mayor hlui Boris Johnson chuan PM din≠hmun chu chuh a tum loh thu a sawi.

David Cameron hian Britain mipuite ngaihdan an lakah EU aṭanga inlakhran duh lam an chak hnuin PM a nihna aṭang hian a bang a ni.

PM thlak tura Conservative Party hruaitu thar atana thlan turah Home Secretary Theresa May chu rinkai ber a ni a, ani bakah hian Leave Campaign laia hruaitu pawimawh zinga mi Justice Secretary Michael Gove hming pawh a langsar hle. Anni pahnih bakah hian Cameron thlaktu rin zingah Stephen Crabb, Dr Liam Fox leh Andrea Leadsom hming pawh a lang tel bawk. Leadsom hi Cameron-a cabinet member niin Energy Secretary a ni a, Crabb hi Work and Pensions Secretary niin, Fox hi defence secretary hlui, Brexit thlawptu langsar tak a ni bawk.

Party hruaitu thar tur hi Conservative Party member-te chuan ram chhung hmun hrang hrangah an thlang ang a, October thla tir lama party conference neih hunah result hi puan a ni ang. Amah thlaktu tur official-a puan a nih hma chuan Cameron hian PM hna hi a lo thawk chhunzawm rih dawn a ni.