Naupang mtd 463 in virtual school kal thei lo : UN

United Nations (UN) chuan khawvela hripui leng mek avanga ram tam takah zirna in khar a nih chhunga online school/virtual school buatsaih ṭhin chu naupang maktaduai 463 velin hmanruate an neih loh avangin an kal ve thei lo tih a tarlang. 

United Nations Children's Fund (UNICEF) chuan hripui lengin vanga school khar leh, lockdown kalpui chu khawvel ram hrang hrangah naupang tluklehdingawn 1.5 vel a nghawng tih a sawi. Mahse ram tam takah virtual class kalpui chhunzawm a ni. Hetih lai hian internet, television leh radio te neih loh avangin naupang tam takin virtual school siam hi an zawm ve thei lo a, ram tam takin zirna in an la hawn mai theih dawn loh  avangin hei hian an zir leh zelna turah pawh nghawng a neih ngei a rinawm.

Virtual school zawm ve thei lo naupang zinga maktaduai 67 chu Africa khawchhak leh chhim lama mi an ni a, maktaduai 54 chu Africa kawthlang lam leh ram laili lai ami an ni. Pacific leh East Asia-ah naupang mtd 80, Middle East leh North Africa-ah mtd 37, South Asia-ah mtd 147 leh Latin America leh Carribean ramah naupang maktaduai 13 ten virtual school hi an kal ve thei lo a ni.