Covid-19 vangin South Korea parliament khar
South Korea-ah Covid-19 kai an pun choh leh tak avang leh, Parliament member eng emaw zat inkhung hrang ngaia an awm avangin nimin khan an ram parliament, National Assembly chu khar lailawk a ni.
Nilaini khan rorellai, Democrats party chuan party meeting an nei a, an meeting-a tel, photojournalist pakhat chuan a hnu lawkah coronavirus a kai tih hriat chhuah a ni. Photographer hi meeting-a tel mi 50-te nen contact a nei a, an zingah hian official leh party lawmaker 32 an tel. Hei vang hian Democrats hruaitu 10 chuang chu inkhung hrangin, test neih an ngai dawn a, party chairman leh parliamentary leader pawh an tel. Hei vang hian thuneitute chuan parliamentary activity awm thei zawng zawng chu nimin aṭanga tihtawp lailawk a nih thu an puang zui ta a ni. Eptu party-te pawhin an neih tum an ṭhulh ngal bawk.
February thlaa Covid-19 vanga parliament an khar lailawk hnua an khar leh hmasak berna a ni a, kha mi ṭum khan meeting-a kalkhawm zingah positive an awm a ni. Tunhnaiah hian South Korea-ah covid-19 hri a darh chho leh mek zel a, Thawhṭanni zan khan hri kai thar mi 280 an awm a, Nilaini khan mi 320 leh nimin khan mi 441 an awm. Heng zinga a tam zawk chu an khawpui Seoul mi an ni tlangpui. Kar liam ta aṭang khan hri kai thar hi nitin mi 30 aṭanga 40 inkarin an awm ziah anga chhut a ni.