Baghdad bomb puakah mi 84 an thi

Inrinni zan khan Iraq khawpui Baghdad-a hmun pahnihah bomb tihpuah a ni a, mi 84 ten thih phahin, mi 176 ten hliam an tuar.

Baghdad khawpui lailia sumdawnna hmunpui, Karada-ah car bomb tihpuah a ni a, he hmunah hian mi 78 an thi a, mi 160 ten liam an tuar a ni. Police leh damdawi in thupuangtute chuan chhungkua leh ṭhalai tam takte Ramadan chawnghei lai an hmang a, zan lam intihharh leh inthun puar tura khawthlera an lÍn chhuah laiin bomb hi a puak a ni. Bomb pakhat dang hi Baghdad khawpui hmar lam, Shia Muslim-te chÍn tamna hmunah a puak a, mi panga an thi a, mi 45 ten hliam an tuar.

Karada-a bomb puak hi IS te chuan an tih niin an chh‚l a, mita hmutute chuan refrigerator van (motor) aṭanga puak a ni tih an sawi. Associated Press-in a tarlan dan chuan thi zinga a tam zawk hi naupang an ni. Bomb puak hian kangmei a siam a, k‚ngṭhelhtuten darkar eng emaw zat an beih hnuah an ṭhelh mit thei chauh a ni.

Kumin chhung ringawtin IS te hian Baghdad khawpuiah pawi an khawih nasa tawh hle. Tun ṭuma an chetna pawh hi mi tam tak chuan Fallujah laksak an nih avanga an thinrim leh phuba lakna thiltih niin an ngai.

February 28 khan Sadr City-ah thihchilh bomb tihpuah a ni a, mi 70 ten an thih phah a, March 6 khan Hilla-a tuialhthei phur motor an tipuak a, mi 47 ten an thih phah. March 26 khan Iskandariya-ah thihchilh bomb tihpuah a ni a, mi 32 an thi. Samawa-ah May 1 khan car bomb tihpuah a ni a, mi 33 an thi a, May 11 khan Baghdad-ah hian car bomb tihpuah a lo ni tawh bawk a, mi 93 lai an thi a, May thla vek, ni 17 khan Baghdad-ah bawk bomb pali tipuakin, mi 69 an thi; bomb pathumte hi Shia Muslim chenna hmuna puak a ni. June 9 khan Baghdad-ah vek hian thihchilh bomb pahnih tihpuah a ni a, mi 30 an thi a ni.