Holocaust survivor leh Nobel laureate Elie Wiesel a thi

Indopui II hunlaia Juda-te tihduhdahna rapthlak tak lo tuarchhuaktu, Nobel Peace Prize chawimawina pawh lo dawng tawh, Elie Wiesel chu kum 87 mi niin kar kalta Inrinni khan a thi.

Romania rama piang, Wiesel hian Indopui II hunlaia Juda-te nghaisak leh suatna rapthlak tak, Holocaust tuartu mi nuai tam tak tana aw chhuahtu niin, an thil tawrh rapthlak tak chu englai maha a theihnghilh theih loh thu a sawi ṭhin. Kum 1986 khan khawvel chawimawina sang, Nobel Peace Prize hlan a ni a, chawimawina hlantu Nobel Committee chuan Wiesel chu mihring tana thuchah kengtu, khawvela tharum thawhna leh chi inthliarna nasa tak hnuaia kawng dik kawhhmuhtu leh hruaitu ropui tak a ni tiin a sawi.

Wiesel hi kum 1963 kan US citizen a ni a, a campaign-naah Holocaust chungchang a sawichhuak reng a, kum 1985-a White House-a Congresssional Gold Medal a dawn ṭum pawh khan khatih laia US President Ronald Reagan-an German thlanmuala pangpar dah a tum pawh a lo sawisel tawh a ni. US President ni lai, Barack Obama nen pawh inpawh ṭha tak ni mah se, Israel chungchanga US policy chu a sawiselsak fo ṭhin. Wiesel hi East Jerusalem-a Israel sorkarin Juda-te chenna in a sak thlawptu niin, US leh khawvel ram dangte pawh Iran-in nuclear program a kalpui chungchangah na zawka Iran lakah che turin a nawr fo a ni.

Kum 1945-a German Nazi-ten Juda mite an khungkhawmna, Buchenwald concentration camp aṭanga a chhuah khan Wiesel hi kum 16 mi a ni a, Nazi-te hian a nu leh pa an thahsak a ni. Indo a zawh hnuin France ramah a kal a, kum 19 mi a nihin journalist a ni a, hun eng emaw ti chhung chu a thil tawn rapthlak tak chungchang chu sawichhuah leh ziah pawh a duh lo.

Wiesel chuan concentration camp-a a zan hmasa ber chu a theihnghilh ngai loh tur thu a sawi a, camp-a an chunga thil thleng rapthlak tak chuan dam zel chakna pawh a tibo vek niin a sawi a, camp aṭanga mi ang pangngaia a chhuak thei chu amah pawhin mak a la ti reng tih pawh a sawi hial a ni.

Nobel Peace Prize a dawn hnuah Wiesel hian Elie Wiesel Foundation for Humanity a din a, lehkhabu 50 chuang a ziak bawk a, heng zinga tam tak chu Holocaust kaihhnawih an ni. Boston University-ah hun rei tak professor a ni bawk. Chawimawina hrang hrang a dawng a, heng zingah hian Britain-in honorary knighthood a pek te, US-in National Humanities Medal a hlan te pawh a tel.