Myanmar-ah mipui thinrimin mosque hal

Myanmar hmar lamah mipui thinrimin kar kalta Zirtawpni lam khan mosque an hal a, hei hi kar khat chhunga mosque beih a nih ṭum hnihna a ni. Hemi hma hian central Bago state-a mosque chu hal a lo ni tawh bawk.

Kachin state-a Hpakant khuaa Buddist mipui thinrim chuan an khuaa mosque hi an hal a, police-te chuan pawikhawihna thlen hnu hian he khua hi an veng zui nghal a ni.

He pawikhawihna thlen hnu hian UN chuan Myanmar ram sorkar thar hnenah sakhaw behchhana inbeihna leh tharum thawhna thleng ṭhin dangte titawp tura theihtawp chhuah turin a hriattir nghal a ni.

Police officer Moe Lwin chuan buaina chhuahna chhan chu mosque hi Buddist pagoda bula sak a nih vang niin a sawi. Buddhist sakhaw zuituten mosque sakna hi sawn tura an ngenna chu Muslim ho hian an zawm duh loh vangin an halsak ta niin a sawi.

Kar kalta vek khan Bago state-a Thayel Tha Mein khuaah Muslim mosque chu hal a ni bawk a, he khuaa Muslim chengte chu khaw ṭhenawmah an tlanchhia a ni. Mosque bakah hian chenna in dang pawh tihchhiat a ni a, Muslim mi pakhat chu kut thlak a ni bawk. Muslim-te venghim tur hian police-te tirh an ni.