Bangladesh cafe beihnaa thi te sun

Bangladesh khawpui, Dhaka-a cafe beihnaa thi mi 20-te chu an ram pumah nimin
aṭang khan ni hnih chhung sunna hun hman a ni. Sorkar office leh building pawimawh dangah te hnam puanzar a ngul chanve-a zar vek a ni .

Kar kalta Zirtawpni zan khan Dhaka-a western-style cafe, Holey Artisan Bakery cafe chu firfiakten an bei a, mi 20 an that. An thah zinga mi 18-te hi ram dang mi an ni. Islamic State (IS) firfiak pawl chuan cafe beitute hi an mi leh sate niin a chhal.

Firfiakte hian cafe chhungah mi an hreng a, an mi hrente chhanchhuah tum hian security force-ten beihpui an thlak a, firfiak paruk an kaphlum a, pakhat chu damin an man. An inbeihnaah hian police pahnih an thi. Firfiakten cafe chhung an hren zinga mi 13 chu chhan≠chhuah an ni a, an zinga
ṭhenkhat chuan hliam an tawrh avangin damdawi-inah dah luh nghal an ni bawk.

Security official-te chuan cafe beitute hian chem hriam tak hmanga an thah thu a sawi.

IS firfiak pawlin cafe beitu niin inchhal mah se, Bangladesh Home Minister Asaduzzaman Khan chuan pawikhawihtute hian IS nen inzawmna an nei lo niin a sawi. Minister chuan, "Cafe beitute hi Jamaeytul Mujahdeen Bangladesh member te an ni" a ti a, he pawl hi kum sawm chuang zet dan pawna hnawl tawh a ni.

Bangladesh Prime Minister Sheikh Hasina chuan Dhaka-a pawikhawihna thleng chu a dem thu a sawi a, Islam chu muanna duhtu sakhua a ni a, sakhaw hminga pawikhawihna leh tual≠thahna thlen tawh lo turin a ngen. Pawisawilote rawng taka thahnaa inhnamhnawihte chu man chhuak vek tura theihtawp an chhuah tur thu a sawi bawk.

Cafe beihnaa thi zingah hian Italy ram mi pakua, Japan mi pasarih, America mi pakhat leh India mi pakhat an tel.