China-in south China sea-ah missile enchhin

China sipaite chuan Nilaini khan south China sea-ah missile pahnih an enchhin niin Hong Kong-a South China Morning Post chanchinbu chuan a tarlang.

Morning Post tarlan dan chuan missile pahnih an chhin te hi DF-26B leh DF-21D missile an ni a, Hainan leh Paracel province inkarah enchhinna hi an nei a ni. DF-21D hi US aircraft beihna tura an duan niin media ṭhenkhat te chuan an tarlang a, Shanghai-a Zhejiang province aṭangin DF-21D hi an kapchhuak a, DF-26B  hi Qinghai province aṭangin an kapchhuak a ni. 

China hian a ram security thuam chak tumin kum 20 zet chu missile, fighter aircraft, nuclear submarine leh indonaa hman tur ralthuam chi dang dang a siam nual tawh a, south China sea-a a ram chin pawh a zau belh zel bawk. 

US president Donald Trump kaihhruai sorkar chuan south China sea-a China-in ram zauh a tum zel chu vawi tam tak lo sawiselsak tawhin, an hmalakna turte an lo dan sak tawh fo tawh a ni. 

He tuipuia hmun ṭhenkhat chu Vietnam, Philippines leh ram dangte chuan an ram chin a nih thu an lo sawi ve tawh bawk a ni.