Spain sipaite Covid-19 dona kawnga thawk turin inpeih

Spanish prime minister Pedro Sanchez chuan nimin khan Covid-19 hri leng a thlen nawn palh thulha hri dona kawnga thawk turin an ram sipaite chu an inpeih thu a sawi.

Hei bakah hian an rama tualchhung thuneitute chuan an mahni bial china hri leng do dan tura thuneihna leh thutlukna an siam theih thu Sanchez chuan sawiin, sorkar laipui tibuai lo zawnga chet an in peih reng thu a sawi bawk. 

Sorkar laipui chuan tualchhung sorkar thuneituten an biala emergency puan an duh chuan a thlawp dawn tih Sanchez chuan a sawi a, "Covid-19 hri hi a la reh lo a, a la darh mek a, hei vang hian englai pawhin kan inralring reng a ngei a ni," tiin Sanchez chuan cabinet meeting an neihnaah a sawi. 

Hri kai darh tur ven nana hnu chhuina kawngah tualchhung sorkarte chuan mamawh an tlakchham chuan sorkar laipuiin a puih vat tur thu Sanchez chuan a sawi. Sanchez chuan an rama zirlai te chu an him dawn thu a sawi a, an zirna hmuna hri a darh loh nan theihtawpin hma an lak mek thu a sawi bawk. Madrid leh Catalonia chuan zirlai zinga test runpui neih an tum thu an puang tawh bawk.