Baghdad-a bomb puaka thi mi 131 an tling tawh Mipui lungawi lo ten kawng an zawh

Iraq khawpui, Baghdad hmun lun laia puaka thi chu mi 131 an tling tawh a, mi 200 chuang hliam tuar an awm tawh. Bomb puak avanga in chim hnuaiah mi eng emaw zat an awm an la ring a, thi leh hliam hi a la pung chho thei a ni.

Bomb puahna hmun Karada-ah hian Muslim tam tak, Ramadan thla serh hmangte an kalkhawm bakah, Euro 2016 quarter finals enin cafe-ah mi tam tak an pungkhawm bawk. He pawikhawihna hi IS te chuan an tih a ni tih an puang. Bomb puak vanga thi zingah hian hmeichhia leh naupang tam tak, shopping mall leh amusement mall tlawha kalte an tel. Police-te chuan in chim hnuaiah ruang eng emaw zat an la awm mai thei tih sawiin, thi zat pawh hi an la punchhoh an rin thu an sawi.

Prime Minister Haider al-Abadi chuan pawikhawihna thleng chu a dem thu a sawi a, bomb puahna hmun hi a tlawh hnuin mitthite chu ram pumah ni thum chhung sun an ni dawn tih a puang nghal bawk.

Hetihlai hian Iraq mipui tam tak chuan an ram hruaitu chu Baghdad khawpui chhunga venhimna kengkawh zo loah puhin lungawi lohna lantirin Pathianni vek khan Karada aṭang hian PM chenna in thlengin kawng an zawh. Kawngzawhtute chuan pawikhawihna thlengah chuan Iraq-a politician-te zawng zawng chu mawhphurtu an ni tiin, hun pawimawhte thlamuang takin an hmang ve thei ngai lo tih an sawi a, politician-te nuamsa taka an lal ina an awm laiin, civil mite chuan beih an tawk fo a ni, an ti. Venhimna lam a ṭhat tawk loh avangin firfiakten chuan puakthei thil tam tak nen checkpoint tam tak an paltlang thei a ni, an ti.

Karada-a bomb puak hi kumin chhunga Iraq rama nikhat thil thua pawikhawihna thleng rapthlak ber a ni. Iraq sipaite chuan thla khat chuang zet IS firfiakten khua an lakte lakkir leh tumin beihpui an thlak mek a, hetihlai hian firfiak pawl hian Iraq ram chhung hmun hrang hrangah pawikhawihna an la thlen reng a ni. Iraq sipaite hian firfiakte kut aṭang hian Fallujah khua la let tawh mah se, Iraq khawpui lian pahnihna, Mosul chu IS thununna hnuaiah a la awm chhunzawm reng a ni.

Iraq politician Mowaffak Baqer al-Rubaie chuan IS-te chuan sipaite kuta an ram lak eng emaw zat an chan leh tak avangin phuba lak nan Baghdad khawpui hi an bei niin a sawi. Iraq-a UN palai, Jan Kubis pawhin IS firfiak pawl phuba lakna a ni tiin, Ramadan thla thianghlima pawisawilo civil mite an bitum dan chu mi dawihzepte chet dan a ni, a ti.