Pakistan-ah tuilian vangin mi 40 chuang thi

Pakistan ram hmar lam, Afghanistan ramri-ah ruahsur nasa avanga tuilian vangin mi 43 an thi tawh a, chenna in 35 leh moque pakhat a hnawl chhe bawk.

Tuilian hi Khyber-Pakhtunkhwa province-a Chitral bialin an tuar nasa zual a, Pathianni zinga tuilian bawhawk chuan Ursoon khuaah chenna in eng emaw zat leh Army post a len chhia a ni. Chitral hi Afghanistan rama Badakhshan province nen inri a ni.

Chitral deputy commissioner, Osama Ahmad Warraich chuan tuilianin a hnawlte ruang hi a tam zawk chu lakchhuah an ni tawh tih a sawi a, ruang ṭhenkhat erawh chu Afghanistan ramah a len lut niin a sawi. Thi zinga 16-te hi tuilianin mosque a lenchhiat laia mosque-a ṭawngṭai hun hmanga awmte an ni.

Tuilian tuarte chhanchhuah hna hi sipaiten an thawk nghal a, mahse khua a chhiat chhunzawm reng avangin hna an thawk chak thei lo.

Kumin April thla khan tuilian leh leimin avangin Khyber Pakhtunkhwa province-ah hian mi 127 an lo thi tawh bawk a ni. Nikum fur lai khan ruahsur nasa avanga tuilian≠ah mi 81 an thi a, mi 300,000 chuang zetin tuilian vang hian harsatna an tawk bawk. Thingtlang hmun tam takah in sakte chu a
ṭhat tawk loh avangin tuilian hian chhiatna a thlen nasat zual phah
ṭhin nia sawi a ni.

Pakistan ramin tuilian a tawrh rapthlak ber chu kum 2010 kum kha a ni a, hemi ṭum hian an ram hmun ngaa ṭhena hmun khatin tuilian hi an tuar a, mi 2,000 dawn an thih bakah mi maktaduai 20 vel chu hmun him lama an insaseng a ngai a ni.