Covid-19 kai mtd 24 chuang tawh Vaccine enchhin mek panga awm

Khawvela  hripui leng mek, Covid-19 kai hmuh chhuah tawh chu nimin thleng khan khawvel pumah maktaduai 24 an chuang tawh a, mi 8,22,000  in an thihpui tawh bawk. 

United States (US) chu hri kai tamna leh hri thihpui tamna ber ram a la ni chhunzawm zel. An rama hri kai hmuh tawh hi maktaduai 5.9 an tling tawh a, Brazil leh India chu US dawta hri kai tamna ram an ni bawk.

Covid-19 vaccine siam tumin ram leh pawl hrang hrangten hma an la mek a, heng zingah hian peihfel hma tura beisei, enchhinna kalpui mek panga an awm. 

University of Oxford leh Pharmaceutical company AstraZeneca siam a nia. India rama Serum Institute of India (SII) chuan he vaccine hi Phase II clinical trial a neihpui mek. Kumin Decmeber thla hian vaccine hi peih hman beisei a ni a, a man hi $ 4 (Rs 295) vel ni tura chhut a ni. 

American drug company Moderna siam, mRNA-1273 vaccine hi trial Phase 3-na kalpui mek a ni a, September thla tawpah zawh theih an inbeisei. Moderna chuan kumin kumtawp lamah an vaccine siam hi an zawrhchhuah theih an beisei a, a man tur hi  Rs1,800 - Rs 23,00 inkar a nih rin a ni. 

China company Sinopharm chuan nakkumah Covid-19 vaccine tlangzarh an tum. He vaccine enchhin, Phase 3 hi UAE-ah neih mek a ni a, vaccine an siam hi dose hnih Rs 10,700 man ni tura chhut a ni. 

Russia chuan August 11 khan khawvela Covid-19 vaccine hmasa ber, Sputnik V an siam chhuah thu a sawi. Russia President Vladimir Putin chuan vaccine hi a him tawk niin a sawi bawk. Mahse he vaccine hi enchhinna, Phase 3 trial neih a la ni lo thung a, volunteer 40,000 ah enchhin leh a ni ang. 

Gamaleya Institute chuan September thla tawpah vaccine hi siamchhuah hman a ni dawn tih a sawi a, a man tur zawt erawh chu puan a la ni lo.