Trump leh Harris-in debate neih an remti

US president inthlan neih tura Republican aiawha chuh tur, Donald Trump leh Democratic candidate Kamala Harris-te chuan September 10-ah inchapchar neih an remti niin US television network, ABC chuan a tarlang.

Donald Trump chuan, "Debate neih hi a pawimawh hle a ni," tiin, inchapchar hun a nghahhlelh tawh thu leh, a chungchang dik lo taka an sawi ṭhin sawifiahna nan a ṭangkai dawn tih a sawi bawk. Debate neih a nih hun tur puan a nih hma hian Trump chuan debate hi ṭum thum neih a duh tih a lo sawi tawh a ni.

Florida, US-a thuthar thehdarhtute nen an inkawmnaah Trump chuan a campaign team-ten Harris chu debate vawi thum neihpuiah a sawm tih sawiin a pe chhuak tur TV network hran ṭheuh leh a hun pawh a danglam vekin ruahmanna an siam a ni, a ti. Heng zinga ABC pek chhuah tura ruahman, September 10-a neih tura rawtna an thlen chu Harris hian a pawm niin a sawi. Hei bakah hian September 4-ah Fox News leh September 25-ah NBC-ah debate neih hi a duh tih a sawi bawk.

September 10-a ABC-in debate a buatsaih turah hian World News Tonight anchor leh managing editor David Muir leh ABC News Live Prime anchor Linsey Davis te chu moderator an ni ang.

Debate neih tur chungchangah hian Kamala Harris campaign team chuan thuchhuah an la siam lo thung. Trump chuan a khingpui Harris chu sawiselin, Biden a inhnuhdawh hnu leh inthlan chuh tura tihchian a nih hnuah press conference emaw interview emaw neiin a la inlan lo niin a sawi. Harris hian tun thla chhung ngeia press conference neih a tum thu a sawi ve bawk.

Donald Trump leh Democrats presidential candidate hmasa, Joe Biden-te chuan June thla khan debate hi an lo nei tawh a, September 10-ah debate vawi hnihna hi nei leh tura ruahman a ni. Mahse debate an neih hmasak berah hian Biden hi a chet ṭhat loh em avangin an party mi leh sate nawrna avangin president candidate a nihna aṭangin a inhnukdawk zui a, Kamala Harris in an thlak ta a ni. September 10-ah Biden aiah Harris zawk a rawn ding dawn ta a ni.