Iraq-in hmeichhia pasal neih theih hun kum 9-ah tihhniam tum

Iraq justice ministry chuan an ram Parliament-ah hmeichhia ten pasal an neih theih hun kum zat, kum 18 ni ṭhin chu kum 9-a tihhniamna tur bill a pu lut.

Personal Status law siamṭhatna tur bill an put luh hi pawm la ni lo mah se, an pawm a nih chuan hmeichia kum 9-a naupang leh mipa kum 15-a naupang te chuan dan hnuaiah nupui pasal an nei thei tawh dawn a ni. Hei hian naupang innei an pun phah leh, kum naupang zawk tan harsatna leh hrehawmna nasa zawk a thlen a hlauhthawnawm hle. Human rights organisation, women's group leh civil society activist-te chuan he bill hi an duh lo hle. Sawiseltute chuan kum tam tak chhung mipa leh hmeichhia intluk tlanna tura an lo beih tawhte chu a thlawn mai a nih a hlauhawm thu an sawi.

Dan thar siam tum hian hmeichhe naupangte zirna, hriselna leh an nunphung thlenga a nghawng pawi theih avangte, hmeichhe chunga hlei lenna leh a hun lo a naupai, zirna chawlhsan an pun a hlauhawm tih Human right oraganization chuan a tarlang. Iraq Women's Network-a thawktu, Amal Kabashi pawhin bill hi nasa taka dodalin, "He dan thar vang hian hmeichhe chunga mipa hleilenna pawh nasa taka a pun a hlauhawm a ni," a ti.

United Nation Children's agency, UNICEF-in a tarlan danin, Iraq-ah he dan hman a la ni lo chung pawhin kum 18 tlin hmaa pasal nei hmeichhia chu 28% chuang an ni tih a tarlang. Human Right Watch(HRW) researcher Sarah Sanbar chuan, "He dan hi an pawm a nih chuan ram chuan hmalam pan loin hnungtawlh zawngin a kal zawk tihna a ni ang," tiin a sawi.