Israel leh Hamas inkara palai hna thawkten Inremna siam tura inbiakna chhunzawm turin ngen

Gaza Strip-a indona thleng mek a tawp theih nana remna palai hna thawktu- United States, Egypt leh Qatar chuan inbiakna nei ṭan leh turin Israel leh Hamas an ngen. Israel chuan an ngenna ngai pawimawhin inbiaknaa tel tur team an tir dawn tih an sawi.

Ram pathumte hian Gaza indona a tawp theih nan Israel leh Hamas inkarah palai hna an thawk a, kumin May thla aṭang khan inkahhai puan a nih theih nan leh mi tang chhuah an nih theih nan ruahmanna siamin, Israel leh Hamas chu inbiakna an neihpui ṭhin a ni. Inbiakna kalpui a nih lai hian Gaza indona chu tawpsan ni loin Israel chuan beihpui a thlak chhunzawm zel a, July 31 khan inbiaknaa Hamas tana an khaipa leh an hotupa Ismail Haniyeh chu thah a ni a, inremna zawnga inbiakna pawh tawpsan zui ve nghal a ni.

US, Egypt leh Qatar chuan thuchhuah inṭawm siamin, kar leh hian inbiakna chhunzawm leh tawh turin Hamas leh Israel chu an ngen a, inkahhai puan a nih dan tur chungchangah thil sawi ho tur a la awm bakah mi tang chhuah an nih dan tur chu sawifel a la ngai tih an tarlang. "Hun khawhral a thiang tawh lo a, inremna tihkhawtlai tuma chhuanlam siamna hun a ni tawh lo bawk" tiin inbiakna chhunzawm ngei se an duh tih an tarlang. Inbiakna neih hun atan August 15 tinzawn niin, Doha emaw Cairo emaw a neih tura ruahman a ni.

US chuan inremna an nei thei dawn hnai nia sawiin, Gaza-a indo mekten inremna an neih theih loh chhan chu thil pali-panga vela an thu a la inhmuh loh vang a ni, a ti. Israel prime minister office chuan remna an neih theih nan inbiaknaah hian Israel aiawh tur an tir dawn tih a sawi chiang tawh bawk.