Israel beihna avangin mi 100 chuang an thi

Hamas thuhnuaia awm, Gaza Strip sorkar chuan Israel airstrike-in Gaza-ah sikul ni ṭhin, chhawmdawlna-in atan hman tak chu fuhin helaia cheng mi 100 chuang in nunna an chan tih an tarlang. Israel hian Hamas leh Islam firfiak, helai hmun aṭanga beihpui thlak ṭhin chu an bitum tih an sawi ve thung.

Hamas state media hian sikula inhumhimna zawngte hian tlai lam ṭawngṭaina an hman laiin Israel hian missile hmangin an kap tih an sawi. Palestinian Civil Defence thupuangtu, Mahmoud Bassal chuan, "Martar 93 an awm tawh a, heng zingah hian naupang 11 leh hmeichhia paruk an tel a ni. An nihna la hriat loh mi eng emaw zat an la awm bawk" a ti.

Israel sipaite chuan sikul an beih ṭuma thi zat, Hamas lamin an tarlan hi an sawi uar niin an sawi a, Hamas leh Islam firfiak dang mi 20 vel an that niin an sawi ve thung. Israel sipai, Lt. Col Nadav Shoshani chuan an hmun beih chu Hamas leh Islam firfiak pawlte bihrukna hmun a ni tih a sawi a, Hamas thuchhuah siam leh Israel Defence Forces (IDF) lam hriat dan an inmil lo tih a sawi ve bawk.

Hamas hian Israel-in mipuite chenna hmun a bei mai chu pawikhawihna lian tak a ni tih sawiin, Hamas political office member, Izzat El-Reshiq chuan thi zingah hian helpawl pakhat mah an awm lo niin a sawi. Palestinian president thupuangtu, Nabih Abu Rudeineh chuan US-in Israel a thlawpna chu titawp tawh se a duh tih a sawi.

Gaza civil mite zingah Palestinian firfiak pawl tam tak an inphum ru niin Israel chuan a sawi ve thung. Heng mite hian sikul, damdawi-in leh humanitarian zone atana puan hmun aṭangin Israel an bei ṭhin niin an tarlang. Israel prime minister, Benjamin Netanyahu chuan Israel tana Hamas an hlauhawm tawh loh thleng beihpui thlak an tum tih a lo sawi tawh. Hetih rual hian August 15-a neih tur, inremna zawnga inbiaknaah erawh Israel in palai a tir dawn tih a sawichiang tawh a ni.