Brazil thlawhtheihna tlaah mi 62 an thi

Brazil ramah August 9, 2024 Zirtawpni khan Guarulhos International Airport aṭanga thlawk chhuak, khualzin 58 leh thawktu pali chuanna thlawhtheihna chu Sao Paulo state-a Vinhendo khuaah chesualin a tla a, a chuangte zawng zawng an thi.

Voepass airline-in an tarlan danin, an thlawhtheihna ATR 72 twin-engine turboprop chetsualna hmun hi Vinhendo-ah niin, mihring chenna hmunah tla in thlawhtheihnaa chuang tih loh chu thi leh hliam an awm lo.

Chhanchhuaktu pawl chuan Inrinni khan thlawhtheihna tlaa nunna chan 62 te ruang lak chhuah hna hi thawk nghalin, an ram huna tlai dar 6:30 ah an thawk zo hman niin São Paulo state sorkar thupuangtu chuan a sawi. Ruang lak chhuahte chu forensic expert ten enfiahin, nunna chante hi mipa 34 leh hmeichhia 28 te an ni tih a sawi.

Sao Paulo public security secretary Guilherme Derrite chuan thlawhtheihna 'black box' pawh hi lak chhuah fel tawh niin, black box aṭanga record awmte hmangin chetsualna thlen chhan hriat theih a rinawm tih thuthar thehdarhtute a hrilh.

He chhiatna thleng hi kum 2023 January-a Yeti Airlines thlawhtheihna, Nepal-a chesuala nunna chan 72 an awm hnua thlawhtheihna chesuala nunna chan an tam lehna ber a ni. Yeti Airlines chetsualna hi pilot tihsual chu an puh ber a, he thlawhtheihna hi ATR 72 tho a ni.