NKorea-in tuilian tuarte an ram khawpuiah an sawn

North Korea state media, Korean Central News Agency (KCNA) chuan an ram chhunga tuilian vanga harsatna tawk mi 15,000 chu NKorea khawpui, Pyongyang lamah sawn an ni dawn tih an tarlang.

KCNA hian July thla tawp lama ruah sur nasa avang khan mi tam takin nunna an chan tih an tarlang a, thi zat hi an la sawi chiang thei lo tih an sawi bawk. Ruah sur a tam avang hian China ramri, hmar lamah tuilian thlengin chenna in leh lo neihna hmunte chu tui hian a chim nasa hle a ni.

NKorea hian tuilian a tuar avang hian ram dangte chuan ṭanpuina pek an duh thu an sawi a, heng zingah hian an hmelma kum hlun leh ṭhenawm ram, South Korea pawh an tel. Mahse NKorea ram hotu, Kim Jong un chuan ramdang ṭanpuina tel loin anmahni ngeiin indinthar leh hna hi an thawk dawn tih a sawi a, NKorea ṭanpui duhtute hnenah lawmthu a sawi zui bawk.

Kim hian tuilian thlenna hmun, Uiju a tlawh ṭumin an ram sorkar chuan tuilian tuartu mi 15,400-te chu an ram khawpui lamah a sawn dawn tih a sawi. Pyongyang-ah hian an chenna hmun siam ṭhat a nih hma chu an awm dawn a ni, Kim chuan a ti.

KCNA-in a tarlan danin chenna hmun bakah eitur, hriselna endik leh zirna thlengin tuilian tuarte ruahmansak an ni dawn a ni. SKorea media-in an tarlan danin tuilian vanga thi leh mi bo zawn mek belhkhawmin mi 1,500 bawr vel an ni tih an tarlang, mahse hei hi Kim chuan a dik tawk lo tih a sawi ve thung.