US hian Israel humhim turin theihtawp a chhuah ang : Pentagon

Hamas hotupa leh Hezbollah hruaitu thah a nih hnuah Middle East-a Iran leh a thurualpuite leh Israel inkar boruak a ṭha lo hle a, indona a chhuah mai a hlauhthawnawm hle. Middle East boruak a ṭhat loh avang hian US chuan Israel himna chu an ngai pawimawh tih sawiin, a humhim turin theihtawp an chhuah zel dawn tih Pentagon chuan a tarlang.

Pentagon chuan defence secretary Lloyd Austin-in US tuihnuai lawng, USS Georgia chu Middle East a dah turin thupek a chhuah tih Pathianni khan a tarlang. USS Georgia hi nuclear paitel tuihnuai-lawng niin, July thla khan Mediterranean tuipui a thleng tawh nia hriat ni mah se US chuan a tih ṭhin dan ang lo takin August 11 khan mipui hriatah a puang chhuak a ni.

Middle East boruak a sosan avangin US chuan sipai leh ralthuam a dah luh belh dawn a, Israel humhim turin theihtawp an chhuah dawn tih Pentagon chuan a sawi. US sipaite chuan Middle East-ah an indo thlawhtheihna leh indo lawngte chu dah belh a ni dawn tih an lo sawi tawh bawk. Heng hi Israel-in venhimna ṭha zawk an neih theih nana ti an ni. "Secretary Austin chuan Middle East boruak thlirin US sipai dah belh leh an sipaite theihna tihpun a pawimawh tih a hria," tiin Pentagon chuan a tarlang a ni.

Hamas hotupa, Ismail Haniyeh chu Iran khawpui, Tehran-ah thah niin Iran chuan Israel thiltih ngei a nih ringin chhan let an tum thu an sawi. Hezbollah senior military commander, Fuad Shukr chu Israel-in Beirut an beih ṭumin a thi ve bawk. Heng thil thleng avang hian Gaza-a indona thleng mek chu Middle East indonaa a chan mai hlauhthawnna a lian hle a, Iran leh a thurualpuite leh Israel inkarah indona a chhuah pawha Israel ṭanpui turin US hian a ralthuamte chu a chhawp hnai a ni.