Greece-ah ram kang vangin mi tam tak sawn chhuak

Greek ramah ram kang nasa tak thleng vangin thuneitute chuan Marathon khua, Marathon lo pianchhuahnaa chengte chu in sawn chhuak turin thu an hriattir.

Marathon khuaa chengte hi Pathianni khan an ṭhenawm, Nea Makri khuaa insawn tura hriattir an ni. Hemi hma hian khaw paruka chengte sawn chhuah an lo ni tawh bawk.

Greek national broadcaster ERT in a tarlan danin, kum 2004 Olympic Games an thlenna hmun Athens Olympic Athletic Center (OAKA), Marathon khua aṭanga km 30-a hlaa awm chu insawnchhuah ngaite awmna atan hian hawn a ni. Health Ministry official-te chuan kangmei chhuak avang hian mi pariat chu damdawiin panpui ni tawh in thawk lamah harsatna an nei tih an sawi a, kangṭhelh pawla mi pakhat chu a taksa a kang na tak a tawrh avangin damdawiin pan pui a ni bawk a ni.

Ram kang hi Pathiannia an ram huna chawhnu dar 3-a Varnavas khua aṭanga rawn chhuak a ni. Thli a tam avang leh khua a ṭhal bawk avangin kangmei hi a ṭaidarh chak hle a, Athens chhehvel pawh meikhuin a bawh nasa hle. Kangmei khu pawh hian Varnavas aṭanga km 100 thleng a tuam pha hial a ni.

Kangṭhelhtu mi 400 te chuan ram kang ṭhelh hna hi an thawk mek a, tuiphur thlawhtheihna 29, kangṭhelh motor 110, sipai leh volunteer tam tak an thawk chhuak bawk a, hmun 40 chuangah kang ṭhelh hna hi thawh mek zel a ni tih Fire Brigade thupuangtu chuan a sawi. Pathianni khan Attica khawthlang lam, Megara khaw bulah kang mei a chhuak bawk a, mahse hei chu an ṭhelh mit thei a ni.

Thuneitute chuan boruak lum zel vangin hmun hrang hrangah kangmei hi chhuak thut thei a nih reng avangin inralring reng turin mipui an chah. Kumtinin Greece hian nipui hunlaiin khaw lum nasa tak leh, dan phal loha ram hal chingte vang in buaina an tawk fo a ni. Kumin chhungin ram kangah mi pahnihin nunna an chan tawh a, nikum khan mi 20 chuangin nunna an chan bawk a ni.