Bangladesh : Sorkarin mipui lungawi lote an ralthuam tung turin a ngen

Bangladesh mipuite nawrna avanga prime minister nihna Shiekh Hasina-in a chawlhsan hnuah sorkar lailawk (interim government) a piang a, he sorkar hian nawrh huaihawt mipuite chu an ralthuam sorkar hnena hlan let turin a ngen.

Bangladesh sorkar lailawka home affairs adviser, Brig Gen (retd) M. Sakhawat Hussain chuan Thawhṭanni khan mipui nuar zinga dan loa silai kawlte leh, nawrh huaihawt laia sipaite lak aṭanga rifles lak chhuahte chu sorkar hnena pe kir turin mipuite chu a ngen a ni.

Hussain chuan police station hnai berah an dah kir emaw tung emaw turin a ngen a, hun tiam chhunga an thupek zawm lo an awm a nih chuan thuneituten ralthuam dap hna an kalpui huna an man chhuak a nih chuan a kawltute chu hremna pek an ni dawn tih a sawi.

Home affairs adviser Hussian hian nawrh huaihawt vanga sipai hliam tuarte chu Combined Military Hospital-ah tlawhin tualchhung buaina vang hian mi 500 chuang nunna chan an awm tih a sawi. Heng bakah hian hliam tuar 1000 chuang an awm niin a sawi bawk.

Bangladesh tualchhung buaina vang hian sorkar ding lai chu paihthlak niin sorkar lailawk thar, Muhammad Yunus kaihhruai chu a piang ta a ni. PM kal chhuak ta, Hasina chuan a himna atan Bangladesh chhuahsanin India ramah a tlanchhe mek bawk. Bangladesh sorkar lailawk hian mipui thlan sorkar a pian theih nan hma an la dawn a, mipuite thlawp sorkar a pian ngei a pawimawh thu an sawi a ni.