Russia ram eptu hruaitu kah hlum a ni

Russia rama eptu pawl hruaitu, Deputy Prime Minister hlui Boris Nemtsov (55) chu kar kalta Zirtawpni zan dar 11.40 vel khan Moscow-ah kahhlum a ni.

Nemstov-a hi Russia parliament, Kremlin leh St Basil Cathedral aṭanga hla vak lo, Bols­hoy Moskvotersky Bridge-a a kal laiin motor aṭangin pistol-in ṭum li kah a ni. Kah a nihna hmunah hian a thi nghal. Russia news website, Meduza chuan Nemstov hi lei-ah hmeichhe pakhat nena an kal laiin, car aṭangin mi eng emaw zat chhuakin an kap niin a tarlang.

Russia President Vladimir Putin chuan tualthahna thleng chu a dem takzet tih sawiin, pawikhawihtu chu manchhuah a nih ngei theih nan chhui zui a nih tur thu a sawi.

Ukraine President Petro Poroshenko chuan Nemtsov chu Ukraine leh Russia inkar boruak siamṭhatu pawimawh tak a ni tih sawiin, tualthattu pawikhawihna chuan an inkar boruak pawh a tichhe lehzual dawn ta a ni, a ti.

Nemtsov hi kum 1990 chhoa economic reformer pawimawh ber zingah a tel. Tun hnaia interview a neihah, Nemtsov chuan Ukraine-a Russia thlawp, helpawl leh Ukraine sipai indona thleng mek a dodal avang­in Putin chuan amah chu a tihhlum tir mai a hlauhthawn thu a lo sawi tawh a ni.

Kum 1990 chho khan President Boris Yeltsin hnuaiah Nemtstov hi deputy prime minister a lo ni tawh a, Russia rama khawpui lian ber zing a mi, Nizhny Novgorod governor a nih laiin sum siamṭhatna kawnga a hnathawh ṭhat avangin mipui hriat a hlawh hle.

Nemtsov-a ukil chuan tun hnaiah social media kaltlangin Nemtsov hian thaha vauna a tawk fo tih a sawi. Nimin, Pathianni khan an ram sum din­hmun chhe zel leh, Russia-in Ukraine rama Crimea bial a laksak a duhlohna lantirin Nemstov hian kawngzawh huaihawt a tum a ni. Mahse kawngzawh a huaihawt hmaa thah a nih tak avangin he thilah hian Putin-a kaihhruai sorkar lam-ṭang tih nia ngai pawh an tam hle. Mi tam tak chuan Nemtsov hi President Putin-a thupek anga kahhlum nia an ngaih thu an sawi.

Sorkar thiltih dana lungawilohna lantira nawrh huaihawt a tum ni, nimin khan Nemstov-a thlawptute chuan amah sunna lantirin kawng an zawh thung. Chawhnu dar 2-ah eptu pawlte chu pungkhawmin, Zirtawpni zana Nemstov-a kah­hlumna hmun, Moskvoretsky Bridge panin kawng an zawh.