IS-in Kristian a man 29 te chhuah dawn

Firfiak pawl, Islamic State (IS) te'n Syria rama Kristian an man zinga 29-te chu a chhuah thuai dawn.

February 23 khan IS hian Syria ram, Hasakah province-a Tal Tamr khua beiin mi 220 an rubo a, an mi rukbote hi Kristian vek nia hriat a ni. Firfiakte hian biak-in tam tak an tihchhiatsak bawk. He inbeihna avang hian chhungkaw 690 velin an in an chan.

Syrian Observatory for Human Rights (SOHR) chuan Assyrian Kristian hruaitute chuan Kristian an mante chhuah an nih theihna atan palai kaltlangin IS hotu hi an bia niin a sawi.

Assyrian Kristian an mante hi IS hian a la ti hlum lo nia hriat a ni bawk.

Hetihlai hian US kaihhruai ṭangrual pawlte chuan Zirtawpni zing aṭang khan Iraq leh Syria rama IS lakah beihpui an thlak chhunzawm leh. Syria rama IS-te hmun pawimawh, ramria Kobani khaw bula mi chu ṭum li an kap a, Iraq-ah pawh al-Asad leh Mosul khaw bula firfiakte hmun an kap bawk.