Venezuela-in US official ṭhenkhat visa a pe dawn lo

Venezuela President Nicolas Maduro chuan US official ṭhenkhat, firfiak tia a sawite chu an ram tlawh phalna, visa an pe thei dawn lo tih a sawi. Visa pek an remtih loh tur official zingah hian US President hlui George W.Bush bakah senator Marco Rubio leh Bob Menendez te an tel.

Kar kalta Inrinnia US laka lungawi lohna lantira an ram khawpui, Caracas-a rally huaihawtah President hian he thu hi a sawi. Official ṭhenkhatte visa pek an remtih dawn loh bakah, an rama US diplomat awm thei tur pawh titlem an tum a, US citizen-te chuan Venezuela tlawh turin visa an dil zel a ngaih tawh bawk ang. Venezuela ramah hian US hian diplomatic staff 100 a nei mek a, hetihlai hian Venezuela hian US-ah diplomat 17 chauh a dah thung.

Maduro chuan Venezuela ramchhung inrelbawlnaah US chu a inrawlh ṭhin avangin he ruahmanna hi siam a ngai ta tih sawiin, an ram venhimna atana tih ngei ngai a ni, a ti.