Tunkar chhungin Iran-in Israel a beih a rinawm : White House

US president Joe Biden chuan Middle East boruak ṭha lo zel chungchang chu Britain, France, Germany leh Italy ram hruaitute sawipuiin, Iran chuan tunkar chhung hian Israel a beih a rinawm thu a sawi. Hemi atana lo inbuatsaih turin khawthlang ram hruaitute chu a hrilh bawk niin White House thupuangtu chuan a sawi.

US chuan Iran-in Israel a bei a nih chuan Gaza Strip-a inkahhai puan a nih theihna tura inbiakna neih mekah pawh nghawng ṭha lo a nei thei dawn a ni, a ti. Iran-in Israel a bei a nih chuan eng angin nge hma an lak ve dawn tih lo ngaihtual fel turin Europe ramte pawh a ngen bawk.

Hamas hotupa leh Hezbollah hruaitu thah a nih hnuah Iran leh a thurualpuite leh Israel inkar boruak hi a ṭha lo chho hle a, Middle East-a indona a chhuah mai hlauhthawnna pawh a lian hle. Hetih lai hian US chuan Israel hi beih rawn a nih chuan Israel a pui dawn tih sawiin, Israel ram himna chu a ngai pawmawh a, humhim turin theihtawp a chhuah dawn tih pawh a lo sawi tawh a ni.

UK prime minister Sir Keir Starmer pawhin Iran president biain, Israel bei lo turin a ti a, Israel beih a nih chuan Middle East security a nghawng pawi dan turte ngaihtuah turin a ngen a ni.