Bangladesh PM hlui Hasina lakah tualthah thubuai ziak lut

Bangladesh prime minister aṭanga paihthlak tak, Sheikh Hasina leh mi dang parukte lakah tualthah thubuai ziah luh a ni tih nimin khan an ram media-te chuan an tarlang.

PM hlui Hasina leh mi dang parukte hi thla liam taa Bangladesh-a sorkar quota siam duh lohna lantira nawrh huaihawt ṭuma tharum thawhna thleng vanga ei tur dawr neitu, Abu Sayed thihnaa mawhphurtua puhin an lakah thubuai theh luh a ni. Thubuai siamsak dang paruk zingah hian Hasina party, Awami League General Secretary Obaidul Quader, home minister hlui Asaduzzaman Khan Kamal, leh Inspector General of Police hlui Chowdhury Abdullah Al Mamun te pawh an tel. Anni bakah hian police official leh sorkar official eng emaw zat hming pawh tarlan tel a ni bawk.

Bangladesh sorkarin sorkar hna laknaa zalenna sualtu fate puala quota a siam duh lohna lantira nawrh huaihawtnaa buaina chhuak vanga nunna chan hi mi 230 chuang an ni. Prime minister Hasina kaihhruai sorkar pawh paihthlak a nih phah bakah, Hasina pawh himna zawngin India ramah a tlanchhe zui a ni.