Ukraine sipaiten Russia khaw 28 an la; Mi 180,000 in sawn chhuak tawh

Ukraine sipaite chuan kar liam ta Thawhlehni aṭanga Russia ram Kursk ramri bawra beihpui an thlak hnuah Russia ram china khaw 28 an la fel tawh a, heng hmuna cheng hmun 10-a ṭhena hmun ruk zet chu an in sawn chhuak tawh.

Regional governor Alexey Smirnov chuan TV kaltlanga meeting an neihah, Russia president Vladimir Putin leh top official-te hnenah Ukraine beihpui thlakna avang hian mi nuai 1.8 in an chenna in leh lo an tlanchhiatsan tawh a, a dang mi 60,000 chuangin hruai chhuah hun an nghak mek bawk niin a sawi.

Ukraine sipaite hian Russia hnuaia awm, ramri aṭanga km 12(7.5 mel) chhung vel leh, km 40 vela zau chu an la tawh a, mahse sipaite khawilai hmunah tak nge an inkhuar tih hriat a har hle niin Smirnov hian a sawi bawk.

Kar liam taa Ukraine sipaite chetna hi kum 2022, February thlaa President Putin-a thupeka Russia-in Ukraine a beih hnuah, Ukraine sipaiten Russia laka beihpui an thlak nat ber nia sawi a ni. Ukraine president Volodymyr Zelensky chuan, "Russia chuan ram dangah indona a chawk chhuak ṭhin a, tunah chuan an chungah a tla ve ta a ni," a ti.

Hetih lai hian Putin chuan Ukraine sipaite chetna hi buaina tisosangtu mai a ni tiin, Russia sipaite chu an ram aṭanga hmelmate pet chhuak turin thu a pe nghal bawk.