Pakistan sipaiten ISI hotu hlui Faiz Hameed an man

Pakistan intelligence agency, Inter-Services Intelligence (ISI) chief hlui, Faiz Hameed chu Thawhṭanni khan Pakistan sipaiten an man a, military custody-ah dah a ni.

Prime minister hlui, Imran Khan-a general duh ber nia sawi ṭhin, Hameed hian 2019 -2021 chhung khan spy agency hotu hna hi chelhin, a hun lai hian a chakin thil a tithei hle nia sawi a ni.

Pakistan army chuan Hameed man a nih chungchangah hian thuchhuah siamin, Supreme Court thupek angin Pakistan Army chuan Lt Gen Faiz Hameed (Retd) laka Top City-in case a thehluhte a chhui chian hnuah man a ni tih a sawi a, sipai court-ah a chungthu hi ngaihtuah a ni ang.

Private housing scheme, Top City chuan kum 2017, May 12 khan spymaster hlui, Hazeed hian firfiaka chetnaa inhnamhnawihna neia puhin an office leh a neitu, Moeez Khan chenna in dapsakna turin thupek a siam tiin a lakah petition a thehlut a ni. Pakistan Rangers leh ISI official-ten Top City office leh Moeez chenna in an dapna aṭang hian rangkachak leh lunghlu tlereuh tam tham tak an laksak niin a puh. Hei bakah ISI official hlui ṭhenkhat chu dan loa housing society chhuhsakah an puh bawk.