Khaw lum vangin Europe-ah mi 47,000 chuangin nunna chan

Europe-ah kum 2023 khan khaw lum lutuk avangin mi 47,000 chuangin nunna an chan a, Europe chhim lam ramte chu khaw lum tuar nasa zualte an ni tih Barcelona Institute for Global Health (ISGlobal) report chuan a tarlang.

Report-a tarlan danin, nikum kha khawvel a lum ber kum a ni. Sik leh sa inthlak nasa avangin khawvelin lum lam a pan zel a, Europe chu khawmualpui zinga boruak lum chakna a ni bawk.

Researcher-te chuan Europe ram 35 aṭangin mitthi leh khaw lum dan chhinchhiahna data an lakkhawm a, heta ṭang hian khaw lum vanga thi zat nia an chhinchhiah hi 47,690 an ni. Mihring cheng zat azira khaw lum vanga thi tam zualna ramte chu Greece, Bulgaria, Italy leh Spain te an ni.

Scientist-te chuan Greece chu 2023 chhunga khaw lum kaihhnawiha vanga thi rate sanna ber nia sawiin, mi maktaduai khat zelah khaw lum vanga thi hi 393 zel awm ang an ni. Italy-in dawtin mi maktaduai khatah mi 209 leh, Spain-ah mi maktaduai khatah mi 175 chu khaw lum vanga thi anga chhut a ni bawk.