Iraq sipaite'n IS lak atanga khua laklet an tum
Iraq Prime Minister Haider al-Abadi chuan an ram hmarlam, Salahudin province-a Islamic State (IS) firfiakte'n khua an lakte lakkir leh tumin sipaite'n firfiakte lakah beihpui an thlak tura hriattir an ni tih Pathianni khan a sawi.
Iraq armed force Commander-in-Chief ni bawk, Abadi hian Pathianni khan sawi lawk loin Salahundin-a provincial operations command a tlawh. Salahduin provincial council-a security committee hotu, Sheikh Jasim al-Jbarra chuan, "Prime Minister hian security force-te chu province hmarlama firfiakte laka beihpui thlak turin thu a pe nghal a ni," a ti.
Abadi hian sipaite leh an thurualpui, Sunni leh Shiite sipaite chu IS te an beihnaah civil mite'n an tawrhna thlen tlem thei ang ber tura che tur leh, an bungrua leh thil neihte pawh zuahsak turin a chah.
Salahudin province khawpui, Tikrit hi Baghdad hmarlam km 170 vela hlaa awm a ni a, he khua hi Iraq President hlui Saddam Hussein-a khua a ni. Nikum nipui lai khan IS firfiakte hian Tikrit leh Iraq rama khawpui lian pahnihna, Mosul hi an la a ni.
Firfiakte laka beihpui thlaknaa Iraq sipaite pui turin Shia sipai 2,000 vel chuan Tirkrit khaw bulah an thleng tawh. Nikuma Iran thlawpna hnuaia din, Hashid Shaabi sipai 5,000 te'n an pui dawn bawk nia sawi a ni.
IS firfiakte hian Assyrian Kristian an man 220 zinga 19-te chu Pathianni khan Syria hmarchhak lamah an chhuah niin activist-te'n an sawi. Report ṭhenkhat chuan an mi mante tlanchhuahna atan hian sum an dawng niin an tarlang.
Assyrian Kristian hotute chuan firfiakte'n an mi man an chhuah 19-te hi IS kuta awm, Sahdddeh khua aṭangin bus-a phurhchhuah an ni a, him takin Hassakeh khuaa Church of the Virgin Mary-ah thlen an ni tawh tih a sawi a, midang an la hren mekte chungchang erawh an hre zui rih lo tih an sawi.
Assyrian Human Rights Network chuan Sharia Court-in Kristian mante hi Muslim nilote'n chhiah an chawi tur ang chu pe ve tura hrilhin, chhiah an pek hnuah chhuah zalen an ni ta tih a sawi. Chhiah chawitir an nih zat erawh tarlan a ni lo.