NKorea-in missile a kapchhuak
North Korea chuan nimin zing khan missile pahnih a kapchhuak a, a duhdan dodala US leh South Korea sipaite'n nunchan zirho an nei leh chu a sawisel nghal bawk.
Kum tina US-South Korea joint military drill neih ṭhin chu North Korea hian a hma pawhin a lo sawisel fo tawh a, kumina military drill neih hian Korea ram pahnihte chu indona kawngah a hnuk hnai tiin a sawi.
South Korea defence ministry chuan NKorea in a kahchhuah, Scud missile pahnihte hi khawthlang lama lawngchawlhna khawpui, Nampo aṭanga kapchhuakin, a kahna aṭanga km 500 vela hla tuipuiah a tla tih a sawi.
UN-in hrekna a siam mekah, NKorea hi ballistic missile engpawh a hman khapsak a ni a, ministry thupuangtu Kim Min-Seok chuan khapna hi palzut a nih chuan na taka an chhan let tur thu a sawi bawk.
Khap a ni chungin NKorea hian kum 2006, 2009 leh 2013-te khan nuclear test a lo nei tawh a ni. Kar hmasaa US expert-te research report an tihchhuahah, NKorea hi kum 2020-ah nuclear ralthuam 100 vel hman tur neia an ngaih thu an tarlang.