Hong Kong-a nawrh huaihawtnaah buaina a chhuak
Hong Kong police-te chuan Pathianni khan China ramri bul khua, Yuen Long-a Chinese mainland aṭanga bazar tura khualzin kal ṭhinte duh lohna lantira nawrh huaihawt zinga mi 30 chuang an man.
Nawrh huaihawtte hnawtdarh tum hian police-te chuan tiang leh pepper spray te an hmang a, nawrh huaihawta pungkhawmte hi tualchhung mi ṭhenkhat nen an intibuai zui bawk.
Tun ṭum hi thla khat chhunga mailand aṭanga sumdawng leh bazar tura kal ṭhinte an duh lohna lantira nawrh huaihawt a nih ṭum thumna a ni.
Hong Kong-a chengte chuan mainland aṭanga tlawhtu an pung chak lutuk chu an duh lo a ni. Nikum khan mainland aṭangin tlawhtu mi maktaduai 47.3 an awm a, kum hmasa aia a punna chu 16% a tling.
Nawrh huaihawtte chuan mainland aṭanga thil lei tura kalte hi Hong Kong sorkarin goods leh service tax a chawitir loh avangin thil ṭha tak takte man tlawm tein an lei a, hei hian retail rental price a tihsan phah a, dawrkai pangaite tan harsatna an siam phah ṭhin a ni, an ti. Sorkar chu mainland aṭanga kalte tan ramri kaltlang chungchangah dan siam danglam turin an phut.