Japan Prime Minister Fumio Kishida a bang dawn

Japanese prime minister Fumio Kishida chuan rorellai, Liberal Democratic Party (LDP)-in September-a hruaitu thar a thlan turah chuh a tum tawh lo tih nimin, August 14 khan a puang. Hei hian LDP chuan hruaitu thar a neih dawn bakah, Japan pawhin prime minister thar a nei dawn a tichiang ta a ni.

Tokyo-a news conference a neihah, Kishida hian LDP chuan hruaitu hmel thar an neih a hun tawh a ni tiin, hruaitu thar chu theihtawp chhuaha lo puihbawm a tum thu a sawi. "LDP chu a inthlak danglam tih leh LDP thar a ni tih mipuite hnena lantir a ṭul tawh a ni," a ti. Kum 2025-a an ramin inthlanpui a neih turah LDP chuan thuneihna chan chhunzawm ngei a duh a nih chuan party hian hmel thar an lantir a ṭul tih expert-te pawhin an lo sawi lang tawh a ni.

Kum 67 mi, Fumio Kishida hi September 2021 khan party president turin kum thum term atana thlan tlin a ni a, genereal election-ah pawh hnehna a chang zui nghal bawk. Mahse an party leh sawisel hlawh tak, Unification Church nena an inzawmna hailan a nih hnu leh, LDP fundraising event atana puanzar loha sum ṭhahnem tak pek a nih dante hriatchhuah a nih hnuah a larna hi a tlahniamin, politics lama a dinhmun pawh a nghawng hle a ni. Mipuiten an party an rinna pawh a tlahniam tawh hle bawk.

LDP president thar hi Parliament chuan an ram prime minister atan a pawm ve leh a ngai dawn a, mahse Parliament-ah majority an neih avangin Kishida thlaktu hi PM atan pawm nghal mai a ni thei dawn a ni.

Kishida thlak a, LDP president ni thei tura hming sawi rik zingah defence minister hlui Shigeru Ishiba leh digital minister Taro Kono chu a langsar deuhte an ni. Anni bakah foreign minister Yoko Kamikawa leh environment minister hlui Shinjiro Kozumi te hming pawh sawi rik a ni bawk.