Myanmar-ah indo laia pawikhawihna a hluar

Myanmar buaina zirchiangtu, United Nations Independent Investigative Mechanism for Myanmar (IIMM) chuan sipai sorkar hnuaiah mihring laka hleihlenna leh indonaa pawikhawihna a hluar tih an sawi.

IIMM hian thla ruk chhungin ramchhung buainain ziaawm lam a pan mai theih loh vangin mi maktaduai 3 chuangin an chenna in an chhuahsan a ngai tih an tarlang bawk. IIMM chief, Nicholas Koumjian chuan Myanmar ram chhunga pawikhawihna thleng ṭhin tichiang turin finfiahna ṭha tawk tak an lakkhawm thu a sawi a ni. Ramchhunga pawikhawihna thleng hi an ram mipuite hrem nan leh hlauhna tuh an duh vang a ni tih Koumjian chuan a sawi bawk.

IIMM report hi July 1, 2023 aṭanga June 30, 2024 atana buatsaih niin hemi hun chhung hian buaina chuan ziaawm lam pan loin a zual zel zawk nia tarlan a ni.

Sipai sorkarin civil mite a nghaisak dan rapthlak tak tak chu tarlan niin mi tangte chu lu tansak an nih bakah hursualna rawngkaia khawih ṭhin niin an sawi. Heng bakah hian civil mite hmunhma - sikul, sakhaw biakna hmun leh damdawi-in chu beih ṭhin a ni tih tarlan a ni bawk.