Houthi helpawlten Yemen-a UNHR pisa an luhchilh

Yemen-a helpawl lian leh chak tak, Houthi helpawl chuan an ram khawpui, Sana-a United Nations Human Rights (UNHR) pisa an luhchilh a, lehkha pawimawh, lirthei leh inchhung bungrua chu an hnehchhuh a ni.

Houthi hian UN leh a thawhpui pawl dangte chu dodalin kumin June thla khan UN leh tlawmngai pawl dang hnuaia thawk, mi 60 chu an lo man tawh a ni. Tun ṭuma UNHR pisa an luhchilh hi UN an dodalna lantirna pakhat niin, UN bakah chhawmdawlna hnathawktu pawl leh ramdang embassy-te chu an rama awm leh hnathawk turin Houthi hian an duh lo a ni.

UN Human Rights hotupa, Volker Türk chuan Thawhlehni khan Houthi-ten UN pisa an luhchilh chungchang leh an thuhnuaia an dah dan hi sawiin August 13, Inrinni khan UN pisa chhevelah an lut a, thawktute chu pisa chhunga thil awmte an kut hlan turin thu an pe tih a sawi. "Ansar Allah sipaite hian pisa hi an chhuahsan nghal a ngai a, bungrua leh thildang an lakte hi an dah let vat tur a ni" Türk chuan a ti.

UNHR office chuan Yemen khawpui, Sana bakah khawpui dang, Houthi helpawlin an thununna hnuai awmah June thla aṭang khan an hnathawhte an chawlhsan tawh tih an sawi a, Yemen hmun dangah erawh hnathawh an chhunzawm reng thung a ni.