Thailand PM Srettha Thavisin ban a ni

Thailan prime minister Srettha Thavisin chu an ram danpui a bawhchhiat avangin Prime Minister a nihna aṭanga ban a ni.

Thailand Constitutional Court chuan Nilaini khan an thutlukna hi puangin, cabinet ruat chungchangah PM hian ram danpui a palzut avangin ban a ni tih a puang. Sretthaa hian court thutluknaah hian judge pakua ah 5-4 in thiam loh a chang a ni.

Judge-te chuan Srettha hian cabinet atana criminal record nei lai lawyer a thlan avangin ram danpuiin 'ethical conduct' a sawi chu a bawhchhia tih an sawi. Court thutlukna puangtu, judge Punya Udchachon chuan, "PM hian a minister tur a ruatnaa dikna a lantir loh avangin, court chuan ram danpuiin phalna a pek angin prime minister a nihna chu a hlihsak ta a ni," a ti.

Prime Minister aṭanga ban tak, Srettha chuan court thutlukna chu a zah thu a sawi a, mahse hetianga thutlukna an siam erawh a lo ring lo tih a sawi.

Srettha chungthu ngaihtuah a nihna chhan chu a minister atana attorney, Pichit a ruat vang a ni. Pichit hi Thailand prime minister hlui, Manchester City club neitu hlui Thaksin Sinawatra laina hnai a ni. Kum 2008 khan eiruk kaihhnawiha thla ruk chhung lung-in a lo tang tawh a ni. Cabinet atana ruat a nih avanga Srettha beih a nih hnuah Srettha humhim tumin minister a nihna aṭang hian a lo bang tawh a ni.

Pheu Thai party-in PM thlaktu tur ngaihtuah dawn

Thailand sorkara party lian ber, Pheu Thai party chuan PM Srettha ban a nih tak avangin a thlaktu tur ngaihtuahin nimin khan meeting an nei nghal.

Prime Minister thar atan hian candidate pahnih - attorney general hlui leh justice minister ni lai Chaikasem Nitisiri (75) leh Thaksin Sinawatara fanu, ram hruaina kawnga tawnhriat la nei vak lo Paetongtarn Shinawatra (37) te an awm a, anni pahnih aṭang hian an thlang dawn a ni.

Party secretary-general Sorawong Thienthong chuan kar thum hmain sorkar thar siam theih an beisei thu a sawi.