Trump-a'n thlan tlin a nih chuan eng chhit man tihhniam a tum

United States president inthlan neih tura Republican aiawha ding tur, Donald Trump chuan August 14, Nilaini khan Asheville, North Carolina-a a campaign ṭumin thlan tlin a nih hnua hma lak a tum dan hrang hrangte a sawi.

Trump hian a thusawi tir lamah a khingpui, Kamala Harris chu beiin a nihna pawh hrechiang lo a ni tih a sawi. Hemi hnu hian hma lak a tum dante tarlangin heng zingah hian eng chhit man chu office a luah aṭanga thla 12 aṭanga 18 inkarah a chanvea tihhniam hman a tum tih a sawi.

US President nihna a chelh leh a nih chuan federal ram chu leilung hausakna zawng tura laih phal a nih tur thu sawiin pipelines phum tura pawmpuina ngaite awlsam zawka hmuh a nih theih nan hmalak a tum bawk. Biden-a sorkarin permit an pek phal lohna, Alaska's Arctic National Wildlife Refuge aṭanga oil tam zawk lakluh phalna pek a tum bawk.

Democrats candidate, Kamala Harris chuan vawiin hian North Carolina a tlawh ve dawn a, sum dinhmun siamṭhat na tura hmalak a tum dante a sawi beisei a ni. Harris campaign official pakhat chuan middle-class chhungkaw tana khawsak hautak lo tura hmalak a tum dan leh sumdawng lianten thil man an chhiar san ṭhin chungchanga hmalak a tum dante a sawi dawn a ni, a ti.

Real Clear Politics-in a chhut danin North Carolina bikah hian Donald Trump chu a chungnung hret a ngaih a ni a, hetih rual hian Harris tan lehpel thei loh a ni tihna a ni lo thung. US president, Joe Biden candidate a nih lai khan chuan Trump hi hnehna chang chiang tura ngaih a ni.